Tarix üzrə xəbər axtarışı:






İnsan hüquqları
üzrə Avropa
məhkəməsinin
BÜLLETENİ
İnzibati hüquq
sual-cavab
BAKIDA KİBERCİNAYƏTKARLIQLA MÜBARİZƏYƏ HƏSR OLUNMUŞ TƏDBİR KEÇİRİLİR
18.02.2013 1631




Bu gün Bakıda "Azərbaycan Hüquq İslahatları Mərkəzi" İctimai Birliyinin (AHİM) təşəbbüsü və Almaniya Federal Ədliyyə Nazirliyinin Beynəlxalq Hüquq Əməkdaşlığı Fondunun (IRZ) maliyyə dəstəyi ilə "Kompüter cinayətkarlığı ilə mübarizədə Almaniya təcrübəsi" mövzusunda elmi-praktik seminar öz işinə başlamışdır.


İki gün davam edən və əsasən, kompüter cinayətlərinin açılması sahəsində ixtisaslaşmış məhkəmə ekspertləri üçün nəzərdə tutulmuş seminarın keçirilməsində məqsəd kompüter texnologiyaları sahəsində baş verən cinayətlərin ekspertizası üzrə beynəlxalq metodologiyanın və müasir texnologiyaların öyrənilməsi, habelə respublikamızın bu sahədə fəaliyyət göstərən mütəxəssislərinin peşə bacarıqlarının inkişaf etdirilməsi və onların müvafiq biliklərinin artırılmasından ibarətdir.

Məruzəçilərinin əsasən, almaniyalı ekspertlərdən ibarət olan tədbirdə Baş prokurorluğun, Ədliyyə, Vergilər, Rabitə və İnformasiya Texnologiyaları nazirliklərinin, Xüsusi Dövlət Mühafizə Xidmətinin Xüsusi Rabitə və İnformasiya Təhlükəsizliyi Dövlət Agentliyinin əməkdaşları, hakimlər və vəkillər iştirak etmişlər.


Tədbiri giriş sözü ilə açan Azərbaycan Respublikası Ədliyyə Nazirliyinin Məhkəmə Ekspertizası Mərkəzinin rəisi Fuad Cavadov almaniyalı qonaqları və iştirakçıları salamlayaraq seminarın məhkəmə ekspertləri üçün əhəmiyyəti, bu sahədə qabaqcıl texnologiyaların öyrəniləməsinin zəruriliyi, habelə məsələnin hüquqi aspektləri barəd məlumat verdi.

Salamlama nitqindən sonra çıxış üçün söz alan AHİM-nin sədri, Vəkillər Kollegiyasının Rəyasət Heyətinin üzvü Anar Bağırov ölkə  Prezidenti cənab İlham Əliyevin Sərəncamına əsasən, "2013"-cü ilin ölkəmizdə "İnformasiya-kommunikasiya texnologiyaları ili" elan olunmasının əhəmiyyəti və tədbirin qeyd olunan Sərəncamın tələbləri ilə uzlaşmasını qeyd etmişdir.

Seminarda almaniyalı mütəxəssislər – Almaniyanın Köln Torpaq Məhkəməsinin sədr müavini, hakim Kristian Şmitz-Yusten "İnternet piratçılığı ilə mübarizənin methodları", həmin məhkəmənin hakimi Jens Şiminovski "Kibercinayətkarlıq – təzahür formaları, Kompüter cinayətkarlığı ilə mübarizədə beynəlxalq normalar, məsələnin Almaniya qanunvericiliyində tənzimlənməsi", həmçinin Köln Baş Polis İdarəsinin Kompüter Cinayətkarlığı  Departamentinin baş komissarı Tomas Qraupeter "Almaniyada polisin kibercinayətkarlıq sahəsində ekspertiza fəaliyyəti" mövzularında çıxışlar etmişlər.

İnteraktiv formada keçirilən seminarda mövzular ətrafında geniz müzakirələr, faydalı fikir mübadilə aparılmış, hər iki ölkənin bu sahədəki təcrübəsi haqqında məlumatlar bölüşülmüşdür.

Seminarın ikinci günü "Provayderin məsuliyyəti və informasiya azadlığı", "Qanunsuz gəlirlərin geri qaytarılması: məsələnin Almaniya və Avropa qanunvericiliyində tənzimlənməsi" və digər mövzularda məruzələr dinləniləcəkdir.